Dun búnker en Pontevedra á conquista o mundo co software libre 

TICGAL convértese en Platinum Partner da rede GLPI, un recoñecemento mundial ao seu traballo en xestión de servizos informáticos.

Nun mundo cada vez máis dixitalizado, o talento pode xurdir nos lugares máis inesperados. Unha pequena empresa ubicada nun búnkee de Pontevedra, TICGAL, ven de acadar un fito sen precedentes: converterse en GLPI Network Platinum Partner , situándose entre as catro únicas empresas a nivel global con esta distinción e sendo a primeira non francesa en logralo.

A nova oficina de TICGAL

GLPI é a solución de software libre máis instalada para a xestión de servizos de TI (ITSM) en todo o mundo. TICGAL, con máis de 10 anos de experiencia, está especializada na implementación e desenvolvemento desta ferramenta, ofrecendo solucións innovadoras a empresas de diversos sectores. “Todas as organizacións teñen servizos de TI e, polo tanto, ferramentas que axudan a optimizar os procesos dos departamentos que os xestionan“. Entre estas solucións, destaca a súa aplicación móbil para GLPI, Gapp, que facilita a xestión móbil, e UXÍA, o seu innovador chatbot de IA multilingüe, incluído o galego!, que automatiza o soporte ao usuario e mellora a eficiencia dos procesos. O recoñecemento como Socio Platinum é un aval da súa experiencia e compromiso coa calidade.

“Para unha empresa que ata hai pouco era unha micro-PYME como nós, este é un logro enorme“, di Óscar Beiro, fundador de TICGAL. “Somos os primeiros non franceses en acadar este recoñecemento, unha gran honra. Unha demostración de que o talento local pode ter un impacto global, moi en consonancia co lema da empresa: Raíces locais, alcance global en TI.”

Óscar Beiro, fundador de TICGAL

E así é. A pesar da súa modesta localización, TICGAL ten clientes en cinco continentes. Desde Australia ata os Estados Unidos e pasando por India e Angola, a empresa galega axuda a organizacións de todo o mundo a optimizar a xestión dos seus recursos de TI. Ademais, desde setembro, TICGAL ten instalacións modernas na rúa Fernando II de Pontevedra, un “búnker” preparado para o crecemento e expansión da empresa.

“Cremos que o software libre é unha ferramenta poderosa para democratizar o acceso á tecnoloxía e mellorar a eficiencia empresarial“, explica Óscar.

Este recoñecemento como Socio Platinum impulsa a TICGAL a seguir traballando á vangarda da xestión de servizos de TI, levando o nome de Galicia a recunchos inimaxinables do planeta.

Datos clave:

• TICGAL convértese en Socio Platinum da rede GLPI.
• Só hai catro socios deste nivel no mundo.
• TICGAL é a primeira empresa non francesa en acadar esta distinción.
• A empresa ten clientes nos cinco continentes, desde Australia ata os Estados Unidos.
• TICGAL está especializada na implementación e desenvolvemento de GLPI, unha solución de software libre para a xestión de servizos de TI.
• Desde setembro, TICGAL opera desde novas instalacións na rúa Fernando II de Pontevedra, un espazo moderno preparado para o crecemento.
• TICGAL ofrece solucións innovadoras como a súa aplicación móbil para GLPI e UXÍA, un chatbot de IA multilingüe (incluído o galego).
• TICGAL ten máis de 10 anos de experiencia no sector.